Vai tawng kan tawng anga kan hmanlar zualte
- Alkat- ra: Sapin 'bitument' an tih hi Vai chuan 'alka-tra' an ti.
- Alu: Vaiin 'alu' an tih hi Mizo chuan 'sap-bal' an ti a, mahse a Vai hming hlirin kan sawi ta a ni, a lam a nawm vang a ni thei e.
- A ra: Vai lam ang angin thingzai-chem hi kan lam ve mai a ni.
- Ata: Chhangphut buh chi khat 'wheat' atang a chhangphut siam hi Vai chuan 'atta' an ti.
- Babu: Office thawk leh Sorkar-a thawk emaw, Company lama thawk pawh ni se, Officer (Gazetted Officer) kai lo 'Non-Gazetted Officer' hi Vaiin 'babu' an tih kan lak a ni.
- Badam: Thlai chi khat a zunga rah chi hi Vai lam ang ang a kan hman ve a ni.
- Balu: Tiau vaivut in sakna 'cement' nena chawhpawlh hi kan chhehvel Vai tawng a ni. Hindi pawhin an ti ve tho.
- Ban: Vai tawng chuan 'band' an ti a, Mizo tawng chuan 'khar, dang, ping' tihna a ni.
- Baltin: Sapin 'bucket' an tih hi Vai lam ve dan ang ang kan lak a ni.
- Bati: Mizo in 'fahrah-khawnvar' kan tih mai, khawnvartui hmang a bur tê tak tê-a chhit ve ve hi.
- Bazar: Dawrkai hmunpui leh therhlo dang zawrhna reng reng hi.
- Bawksik: Vai chuan 'baksis' an ti a, tunlaia 'free gift' an tih ang deuh hi a ni ber a. An thil lei avanga lawmthu siaw nan inpek hi.
- Bawrhsap: Hei hi tunlai a 'Deputy Commisioner' hi an ni. Vai chuan sap lian leh hotu tiin 'bara sahep' an tih chu kan lak pai tak deuh a ni.
- Buara: Vai chuan 'basta' an tih chu kan lam pai mai a ni.
- Chahbi: Vai chuan 'chabi' an ti.
- Chana: Vai pawhin 'chana' an ti.
- Chapal: Pheikhawk pum ni lo a kaihna a kawkalh zawng te a phan hi. Vai chuan 'chappa' an ti.
- Chawkidar: Vai chuan 'chokidar' an ti a, a awmzia tak chu 'thutthleng-nghaktu' tihna a ni. Tunlaia 4th. Grade an pu koh nghak a, an pindan kawngka pawn lama koh nghak a thutthlenga an thut thin avanga 'chokidar' tih a ni.
- Chawtani: Vai chuan 'chatni' an ti.
- Chhuti: Vai chuan 'Chhutti' tiin an ziak.
- Chinai: 'Chuna' Vaiin an tih hi. Pi leh pute chuan 'hawlrivâp' an ti a, keinin 'chinai' kan ti.
- Chini: Mizo chuan tun hma chuan 'rial-chini' an ti a. Mahse 'rial-chini' an tih tak kha chu, chithlum ni tho si tlang lian tak tak a ni. Rial a an deuh roh avang a'rial-chini' ti an ni.
- Chokâ: Chaw chhuma in rawngbawlna hmun hi. Hindi chuan 'langar' an ti a, kan chhehvela Vai ho chuan'chokâ' an ti thung.
- Dahrawk: Police hotu arsi pahnih leh 'ribbon' bel hi. Vai chuan 'daroga' an ti.
- Dak: Hi hi Vai tawng ang ngau ngau kan hman a ni. Postal Service lam reng reng leh lehkha inthawn tawn kal vel hi.
- Dal: Mizo chuan a hran neiin, 'dailuah' kan ti na a, a Vai hming kan chelek lar hle.
- Dâwl: Lehkhaden dan chi khat a 'zasawm inchuh' kan tih hi a zasawm kha 'dâwl' kan ti a. Chu chu Vaiin 'sawm' an tihna 'das' lam paiin kan hmang.
- Dawrkai: Vaiin dawr an sawina 'dukan' chu keinin 'dawrkai' kan ti.
- Dekchi: Bel bial uikual nei lo chhin nei hi a Vai tawng ang angin kan hmang.
- Duli: Cheng khat chanve hi kan chhehvel Vaiho lam dan anga kan hman a ni.
- Dut: Vai chuan hnute reng reng hi 'dudh' tiin an sawi a, chu chu kan lo hmang ve a. Vai thenkhat phei chuan hnutebu taksa a mi pawh 'dudh' an ti.
- Hal: Lei leh nan bawngpa emaw, lawi emaw, pahnih zel a inkawpin a leilehna hmaraw chi khat, a hmawr zum verh vurh chu an ran chhawr hmangin an hnuh phuttir a. Chu hmanrua tak chu Vaiin 'hal' an ti a. Mahse a hnuktu ran tuak khat zel sawi nan pawh 'bawng hal khat' an tih chuan a ran inkawp zel sawi nan pawh an hmang zui bawk.
- Hapta: 'Chawlhkar' hi Urdu chuan 'hafta' an ti a. Chumi atang chuan keinin 'hapta' tiin kan la chhawng a. Hindi chuan 'saptah' tih a ni.
- Hisap: Chhiarkawp hi Urdu chuan 'hisap' an ti a. Chumi atang chuan 'chhût' sawi nan kan hmang ta a ni.
- Havildar: Sipai bel thum kai hi. Khawmual sipai belthum kai sawina a ni bik.
- Hawrawp: Sapin 'alphabets' an tih mal mal hi Vai chuan 'haraf' an ti.
- Istiri: Puan nawh marna tura siam tihsat thin a an nawhna hi. Urdu tawng chuan 'istiri' tih chu 'hmeichhia' tihna zu ni teh daih a.
- Kamis: Vai chuan 'qamis' an ti. An tawng kan tawm mai mai a ni.
- Kawlawm: Tun hmaa lehkhatuia chiah chawp zel a ziakna chi khat kha Vai chuan 'qalam' an tih chu 'kawlawm' kan ti ve ta a ni.
- Kawpza: Kawngkhar leh thil chhin hawn leh khar theihna tura an vuah thir phek thlep thei hi. Vai chuan'qabja' an ti.
- Khaini: Sahdah chi khat hnawng cher chawr rim na tak, a siamtu Company chuan 'tobacco' an ti a. Vai chuan 'Khaini' an ti ve mai tho.
- Khandaih: Sanskrit tawng atanga lak, anni chuan 'Khanda' an ti.
- Khel: Infiamna lam reng reng hi Vai chuan 'khelna, khelta' tiin an sawi a, chu chu la chhawngin 'inkhel' te kan lo ti ve ta a ni.
- Khilai: Ei leh bar thila mahni senso a midangte nen a ei tlan hi. Ei leh bar thilah lo chuan Vai chuan an hmang ngai lo. Keini erawh chuan Cinema en man min tum sak chuan 'khilai' tiin kan hmang zau hle.
- Khul: Vai chuan 'khol' an ti a, a awmzia tak chu 'hawng' (open) tihna a ni na a, la chhuak emaw, lei chhuak (deliver) tih nan emaw hman a ni.
- Kudam: Saptawnga godown chu Vaiin an lam thiam lova ,'gudam' an ti a, chu chu keinin kudam ka lo ti ta mai ani.
- Kunia: Kil dik tak (right angle) teh nana hmanraw chi khat, Vaiin 'kil' (kona) antih atangin 'qunia' an tih chu kan hmanpui ani.
- Kurtai: Kan ram chhehvel hnam chekhnawk Vaiho tawng, anni pawhin 'gur' tih atanga an lak a ni.
- Kuhva: Vai hnam thenkhat chuan 'quwa' an ti. Nepali chuan 'supari' an ti tlat.
- Laltin: Sapin 'lantern' an tih atangin Vaiin 'Laltin' an tih chu kan lak a ni.
- Larsap: British hun lai chuan Governor chu sap an niin an 'title' an hming bula British Sorkarin nihna ropui a pek 'lord' tih chu an hming tel lovin 'lord saheb' an ti a. Chu chu keinin 'larsap' kan ti ta a ni.
- Lekha: Mizo-in lehkha kan nei lo, Vaiin 'lehkha' kan tih hi 'lekha' an ti a. Chu chu la in 'lehkha' kan ti ta a ni.
- Limbu: Tuna kan lam ang hi chu Nepali hnam chi pêng pakhat hming a ni. Limbu ni lovin 'nimbu' tih a ni a, ser (thei) chi khat hming a ni.
- Lip: Mizo in savun kan lip ang hi ni lovin, lei chhuat, tlak leisen tha tak, tui nen kawi tha tak pawnchhia a chul thar hi Vaiin 'lipai' an ti.
- Maida: Vai lam chhangphut chi khat, chhangphut dip tha leh var tak, chhanga an siam tam ber chi hi Vai lam ang angin 'maida' kan ti ve a ni.
- Mawmbati: Sathau khawnvar kan ti mai a, sathau tak tak atanga siam pawh a ni lo. A tlawn var ama tawka alh êng tak hi Vai chuan 'mombati' an ti.
- Mawza: Kephah tuam chhuaka phiar pum kan bun hi Vai chuan 'mawja' an ti a, 'mawja' tih chu 'sahmul' tihna a ni a. Hetiang thilah hian sahmul an phiar thin avang a ti an ni a. Mahse keini chuan eng hmang pawha ke-a bun chi phiar hi 'mawza' kan ti ta vek a ni.
- Mil: Mahni tawng ang hrim a kan hman zingah pawh kan hman lar a ni. 'Thil inmil, ka mil loh zawng' kan tih a 'mil' tih hi Vai tawng a ni. Kan tawng chuan rem tih a ni.
- Mutia: Kan chhehvel Vai tawng a ni, anni chuan 'mutaih' an ti. Bungraw thiar veltu hi.
- Pawisa: Hmakhawsang atangin Mizote hian pawisa kan nei ngai lo. Tuna kan lam dana 'pawisa' kan tih pawh hi Vai tawng a ni. Anni chuan 'paisa' an ti a, pakhat aia a tam leh 'paise' an ti leh mai.
- Perek: Kan chhehvel hnaivai Vaiho tawng a ni. Annni chuan 'perekh' tiin an ziak.
- Phakar: Vervek leh fing kherek chi hi, kan hnaivai Vai ho tawng a ni mai thei.
- Phita: Khawnvartui hmanga kan khawnvar chhit alhtirtu la leh puan sawi nan kan hmang bik a. Vai chuan 'ribbon' piana piang lam chi reng reng 'ribbon' thleng pawh chuan 'phita' an ti vek.
- Pisa: Sapin 'Office' an tih hi Vaiin an hman dan angin 'pisa' kan ti a, a khawril lam khu chuan 'dafter' an ti.
- Pudina: Hlo chi khat lei bet taka to rim na tak chawhmeha an hman hi.
- Puri: Chhangphut chhanga tan ben perh zeta hriak sova thlak hmin hi.
- Rangva: Kan chhehvel Vai tawng a ni. Anni chuan 'rangwa' tiin an ziak.
- Rakzu: A kumkhaw thilah Mizo -in rakzu kan nei ngai lo. Vaiin 'raksi' an tih chu zu tho a nih avangin 'rakzu' kan ti ta mai a ni.
- Randa: Thing nawh mamna hi Vai tawng anga kan tawm a ni.
- Rawng: A sen te, a hring leh a dum te sawi nana 'rawng' kan tih hi Vai chuan 'rang' an ti.
- Rawmawl: Inhruk nan a puan hlai lo te kan pai thin hi Vai chuan 'rumal' an ti.
- Rawra: Cement-a pawlh thin lungte hi Vai chuan 'rora' an ti a, 'rori' ti pawh an awm.
- Rizai: Mutbu lachilh hi Vai chuan 'rijai' an ti a, kan chhehvel tawng a ni.
- Sabawn: Mizo in kan nei ngai loh 'sabawn' hi Vai chuan 'saban' an ti.
- Sahdah: Ruih theih thil chi khat an hmuam thin hi vai chuan 'sada' an ti.
- Salam: Arabic tawng a 'shalom' an tih atanga lak Vaiin 'salaam' an tih inchibai bukna tawng a ni.
- Sana: Vaiin rangkachak an bun thin a, Mizo in an thil bun hming an zawhin Vai ho chuan 'rangkachak' tiin 'sona' an ti a. Chu chu 'sana' (watch) tih nan kan lo hmang ta a ni.
- Sap: Mizorama Vai an rawn len lai a sipai hotu lian 'gazetted officer' kai chin chu Vaiho chuan 'saheb' (sap) tiin an ko thin a. Chung 'saheb' kai chin chu 'mingo' hlir an nih si avangin 'sap' (saheb) tih chu 'mingo' ho sawi nan kan hmang ta hlauh a ni.
- Sazai: 'Hremna' (punishment) tihna a ni, Vai chuan 'saza' an ti.
- Siai: Keini chuan pheikhawk hlo tih nan kan hmang. Vai chuan lehkhatui (ink) sawi nana an hman a ni a, 'syahi' an ti.
- Sihal: Kan rama sa awm ngai lo' sihal' hi Vai tawng la kawi a 'sihal' ti kan ni. Vai chuan 'shyal' an ti.
- Siki: Cheng khat hmun li-a then a hmun khat, tunlai chuan paisa 25 hi.
- Sikri: Meihawl chhemna rangva khawr lak sawn theih hi kan chhevel Vai tawng a ni. 'Thuk' sawi nan pawh an hmang.
- Sipai: Vai chuan 'sipahi' an ti a, 'sepoy' tih erawh hi chu Sap sipela an ziak ve dan a ni.
- Tangka: Mizo in pawisa kan nei lo a, Bengali hoten 'tekka' an tih atanga lak a ni.
- Tahrik: Ni zat sapin 'date' an tih sawi nan Vai chuan 'tahrik' an ti.
- Tala: Thil kalhna Sapin 'lock' an tih hi Vai lam ang anga kan tawm a ni.
- Têl: Hriak chi reng reng ei chi emaw chi lo emaw, Vai chuan 'tel' an ti.
- Theka: Kan tawng ang mai kan hman tawh Sapin 'conctract' an tih hi, 'Contractor' tih pawh 'thekadar' an ti thin.
- Tin: Rangva lam chi reng reng hi Vai chuan 'tin' an ti vek.
- Ukil: Dan hremi hi Vai chuan 'wakil' (vakil) an tih Sapin 'lawer' an tih hi.
- Vatawk/Varak: Vatawk leh varak hi a phnih hian hming pakhat Vaiin 'batak' an tih atanga lak ve ve niin a lang. Vatâwk leh varak chu ran chi dang anih avangin Mizo in 'vatâwk' tiin a lianchi hming an sa a, a tê deuh chu 'varak ' an ti ta mai a ni.